Mosuway na si Christian Araneta nga mahimong labing bag-ong world boxing champion sa Pilipinas karong Huwebes sa gabii, Hunyo 19, 2025, batok ni Thai Thanongsak Simsri sa inilugay sa bakanteng International Boxing Federation (IBF) light flyweight title sa Ota-City General Gymnasium sa Tokyo, Japan.
Mao kini ang labing unang higayon nga manuktok alang sa world title si Araneta kinsa lumad nga taga Mandaue City ug sakop sa Omega Boxing stable.
Sa interbyu sa SunStar Cebu, ang head trainer ni Araneta nga si Jinggoy Junco nipadayag sa iyang dakong pagsalig nga modaog ang iyang batos pinaagi sa knockout.
Matod ni Junco nga kon moataki og sayo si Simsri, hayan matiklo kini og sayo ni Araneta.
Apan kon modagandagan si Simsri, nagtuo si Junco nga madakpan ra gihapon kini ni Araneta sa ulahing bahin sa away.
Gilauman nga grabe ang binukbokay nga masaksihan ning awaya tungod kay parehong lehitimong knockout punchers ang duha ka mga boksidor.
Si Araneta, 30, adunay 24-2, 20KOs nga rekord samtang si Simsri, 25, kinsa nakabiktima na og dekalidad nga mga Pinoy nga boksidor nga sila si John Paul Gabunilas ug Miel Fajardo, naggunit og 38-1, 34KOs nga rekord.
Kon modaog si Araneta, hayan mahimo siya nga ikatulong world champion sa Pilipinas sa kasamtangan sunod nila ni World Boxing Council (WBC) minimumweight king Melvin Jerusalem ug IBF minimumweight titleholder Pedro Taduran. / ESL