Way giendurso nga kandidato ang Archdiocese of Cebu alang sa umaabot nga eleksyon sa Mayo 12, 2025.
Mao kini ang gipagawas nga pamahayag sa Archdiocese of Cebu niadtong Miyerkules, Mayo 7, 2025, nga nagmando sa pagtangtang sa mga poster nga nikatap sa social media nga nagpakita kang Archbishop Jose S. Palma kauban sa usa ka Cebu City mayoralty candidate. Ang poster nga dunay caption "THANK YOU ARCH. JOSE PALMA," masabot nga giendurso apan ang Archdiocese nanghimakak niini.
Matod sa pamahayag nga ang Arsobispo , “not endorsing any political candidate, whether at the local or national level. Neither has the Archbishop allowed any of his priests to use the pulpit to promote or defend any political party or candidate”.
Dunay campaign poster nga nikatap online nga nagpakita kang kanhi Mayor Michael Rama tapad ni Palma.
Ang SunStar Cebu nisuway sa pagkuha sa habig ni Rama sa Huwebes, Mayo 8, kon nasayod ba siya sa nikatap nga hulagway apan nagpahigayon kini og motorcade.
Ang Archdiocese nitumbok og duha ka rason ngano nga ilang ipatangtang ang posters.
Una, basin ang posters maka-impluwensiya sa mga parokyano ug kini kalapasan sa Omnibus Election Code ug ikaduha, ang paggamit sa hulagway ni Palma way pagtugot nga tataw'ng kalapasan sa Data Privacy Act (R.A. 10173). Ang pamahayag gipirmahan ni Atty. Rev. Fr. Domingo P. Delos Angeles, Jr., Legal Officer sa Archdiocese of Cebu, ug giaprobahan ni Palma.
Subay niini, ang Archdiocese nihalad og mga pag-ampo alang sa malinawon ug limpyo nga midterm elections. / CDF