Gihangop sa kapulisan sa Dakbayan sa Sugbo ang bag-ong napili nga mayor nga si Konsehal Nestor Archival ug sa bise niini nga si kanhi Mayor Tomas Osmeña.
Gibutyag ni Maria Theresa Macatangay deputy city director for operation sa Cebu City Police Office (CCPO) nga hugot nga suporta ang ilang ihatag sa bag-ong mayor.
Una na nga nibutyag si Archival atol sa interview sa Supebalita Cebu nga duna siyay nindot nga programa sa kapulisan aron magpabilin nga malinawon ug luwas ang dakbayan gikan sa mga badlungon sa katilingban.
Kon hingpit na nga makalingkod isip mayor, makigtagbo si Archival sa hepe sa kapulisan aron ma-assess ang sitwasyon sa CCPO ug unsay iyang matabang sa kapulisan.
Nalipay siya nga usa sa mga konsehal nga napili mao ang kanhi heneral nga si Paul Labra nga mao unya ang iyang pahupton sa chairmanship sa peace and order sa konseho.
Samtang masaligon si Macatangay nga mapadayon ni Archival ang pagtukod sa P50 milyunes nga bag-ong CCPO Building nga una na nga giinagurahan sa kasamtangan nga mayor sa siyudad Raymond Alvin Garcia.
Taas ang panglantaw ni Macatangay sa bag-ong mayor sa siyudad ilabi na sa paghatag og suporta sa kapulisan. / AYB