Gihugtan sa kapulisan sa Dakbayan sa Sugbo ang seguridad sa mga pantalan ug terminal sa bus nunot sa pagsugod sa pagpanguli sa mga tawo sa ilang tagsa-tagsa ka probinsiya alang sa pagsaulog sa Semana Santa.
Gipangulohan ni City Police Director, Police Colonel George Ylanan, uban sa iyang command group ug ni Cebu City Mayor Nestor Archival, ang pag-inspeksyon sa mga terminal aron maseguro nga hapsay ug luwas ang pagbiyahe sa mga pasahero.
Gisusi ni Colonel Ylanan ang iyang mga sakop nga gipakatap sa Pier 1 ug 2, lakip na ang North ug Cebu South Bus Terminal, aron maseguro nga nagtuman sila sa ilang katungdanan sa pagbantay sa kaluwasan sa publiko.
Gawas sa mga terminal, gipang-check sab ang mga police personnel nga gipatap sa kadalanan isip kabahin sa police visibility nga programa sa dakbayan.
Gimanduan ni Ylanan ang tanang kapulisan nga magpabiling mabinantayon ug andam kanunay mohatag og tabang sa mga pasahero nga nanginahanglan.
Gipasalig sa hepe nga magpadayon ang ilang high alert status ug hugot nga seguridad, ilabi na sa mga dapit nga dunay mga relihiyosong kalihukan alang sa Biyernes Santo sa Abril 3, 2026.
Giila na sa kapulisan ang mga dapit nga dagsaon sa mga deboto, sama sa Celestial Garden sa Banawa, Barangay Guadalupe, nga usa sa mga prayoridad nga dapit sa seguridad tungod sa gidaghanon sa mga Katoliko nga magtapok didto. / AYB