Gipaabot ni Cebu City Mayor Nestor Archival ang mensahe ni Presidente Ferdinand Marcos Jr. sa iyang ikaupat nga State of the Nation Address (SONA) karong adlawa, Hulyo 28, 2025, partikular na mahitungod sa direksyon sa iyang nasudnong polisiya nga may kalabotan sa lokal nga lebel.
Apan sa usa ka interbyu niadtong Biyernes, Hulyo 25, 2025, gibutyag ni Archival nga dili siya motambong sa SONA tungod sa mubo nga pahibalo og kakuwang sa imbitasyon.
Lakip sa gustong mahibaw-an sa mayor ang bag-ong tariff rates nga gipahamtang sa mga export sa Pilipinas,
Gikuwestiyon ni Archival ang P3 bilyones nga hinabang gikan sa administrasyon ni Trump.
"Sakto ba kaha ni (P3 billion) nga maka-offset sa tariff nga iyahang gipa-impose?" matud pa ni Archival.
Labaw pa sa mga kabalaka sa ekonomiya, gipaabot ni Archival ang mga plano sa presidente bahin sa pag-atiman sa kinaiyahan sa nahibiling tulo ka tuig sa iyang termino.
Gusto usab niya nga mahibaw-an ang mga update sa programang P20/kilo nga subsidiya sa bugas, nga nagsugod sa Lalawigan sa Sugbo niadtong Mayo 2025, ug gikatakdang ipatuman sa Dakbayan sa Sugbo sa sunod tuig.
Ang mayor nagpaabot usab sa mga report sa kalambuan sa Pambansang Pabahay Para sa Pilipino Housing Program o 4PH, usa ka socialized housing program.
Iyang namatikdan ang hinay nga pagpatuman niini sa siyudad bisan pa sa kapasidad sa lokal nga kagamhanan.
Gipaabot usab ni Archival ang mga pahayag sa presidente bahin sa Cebu Bus Rapid Transit (CBRT) project.
Nagtinguha si Archival nga mahuman na ang Package One sa proyekto sa labing madali nga panahon.
Posibleng magsugod ang trial run sa BRT karong Septiyembre 15. / EHP