Si Cebu City Mayor Raymond Alvin Garcia nihagit kang Cebu City Councilor Nestor Archival kabahin sa programa sa pagpatubo sa uhong pinaagi sa pag-imbitar kaniya nga tudloan ang mga benepisyaryo imbes nga mosaway.
Kini human gikuwestiyon ni Archival ang maong proyekto sa usa ka executive session niadtong Abril 2, 2025.
Matod sa konsehal nga wala siyay nakita nga output sa iyang pag-inspeksyon sa mga site sa pag-uma sa uhong.
Si Archival nga usa ka mushroom grower kaniadto niingon nga nabalaka siya sa pagpatuman sa programa sanglit ang pagpatubo sa uhong nagkinahanglan og dakong oras ug hugot nga pag-monitor.
Atol sa usa ka press conference sa Lunes, Abril 7, si Garcia nihangyo kang Archival nga tudloan ang mga benepisyaryo kon unsaon pagpatubo sa uhong.
“Ako pa niya, public servant man gyud kaha siya and he is known to be growing mushrooms… (and) sa iyang experience sa pag-grow ug mushrooms ug uban pang mga tanom diha, maypa muhangyo nalang tingale ko nga tudloi nalang ang atoang beneficiaries unsaon pag-grow og mushrooms,” matod ni Garcia.
“Makatabang pa ta kaysa magsige lang ta’g paghot,” dugang niya.
Si Garcia ug Archival parehas nga molansar pagka-mayor sa Siyudad sa Sugbo.
Para ni Garcia, ang pag-komentaryo ni Archival sa programa sa mushroom growing gitumong alang sa nagsingabot nga eleksyon karong Mayo 2025.
“It is the political season and everybody is entitled to their own entertainment,” matod sa mayor. / JPS