Aron pagsiguro sa seguridad sa negosyo sa mga vendor sa Carbon Public Market, ingon man pag-kontrolar sa pagsaka sa presyo sa mga palaliton sa maong dapit, si Cebu City mayor-elect Nestor Archival nipadayag sa iyang intensyon sa pag-review sa kasamtangang 2021 Joint Venture Agreement (JVA) tali sa Cebu City Government ug Megawide Construction Corporation nga iyang gitawag nga disadvantageous sa mga manindahay.
Hinuon niingon si Archival sa interbyu niadtong Lunes, Hunyo 2, 2025, nga wala pa sila magkatagbo sa mga representante sa Megawide Construction Corporation.
Dugang niya nga wala sab siyay plano nga kanselahon ang kontrata sa Megawide ug sa kagamhanan sa Dakbayan sa Sugbo.
Si Archival nagsaulog sa iyang ika-67 nga adlaw’ng natawhan niadtong Lunes uban sa mga tindera sa Carbon nga gisugdan sa misa unya gisundan sa boodle fight buffet.
Sa maong selebrasyon, gipaambit ni Archival ang iyang mga kasinatian isip usa ka manindahay sab sa pampublikong merkado kaniadto.
Ang mayor-elect nagpahayag og kabalaka nga ang proyekto sa modernisasyon, nga gipangulohan sa Cebu2World Development Inc., usa ka subsidiary sa Megawide, mahimong mosangpot sa pagtaas sa taripa ug pagpalagpot sa gagmay nga mga manindahay nga pulihan og dagko nga mga establisemento.
Matod ni Archival nga iyang sigurohon nga magpabilin ang kahigayunan sa mga manindahay nga makapanginabuhi ug nga ang presyo sa mga palaliton sa Carbon Market magpabilin nga barato. / EHP