Malaumon si Cebu City Mayor-elect Nestor Archival sa paspas nga pag-aprobar sa Comprehensive Land Use Plan (Clup) ug sa iyang ordinansahon alang sa solar panel system sa City Hall buildings.
Ang duha ka ordinansahon wala pa maaksiyoni sa konseho sa Dakbayan sa Sugbo samtang padulong na nga molingkod si Archival isip bag-ong mayor sa Hunyo 30.
Atol sa interview sa Lunes, Mayo 26, 2025, si Archival nagkanayon nga ang Clup nakasinati og sobrang kalangan.
Ang Clup usa ka critical urban planning document nga magsilbing blueprint sa pagtubo ug paglambo sa siyudad nga maggiya sa land use, zoning, infrastructure, ug environmental protection sa gitakda nga panahon.
Sayo niini, ang Regional Development Council niaprobar sa pagtugot sa kagamhanan sa Dakbayan sa Sugbo nga i-update ang ilang guidebook sa urban development.
Sa giusab nga Clup, giuna sa siyudad ang flood control, pag-usa sa public transportation pinaagi sa Local Public Transport Route Plan ug conservation efforts, apil ang Central Cebu Protected Landscape (CCPL).
Ang proposed revised Clup ug Zoning Ordinance gitumong aron mapanalipdan ang CCPL samtang mopasubay sa infrastructure strategies sa local government units sa Metro Cebu.
Ang pag-aprobar sa Clup nahimong hisgutanan atol sa transition meeting tali sa team ni Archival ug ni outgoing Mayor Raymond Alvin Garcia nga gihimo sa Mayor’s Office sa City Hall Lunes, Mayo 26, 2025.
Sila si Archival ug Garcia nipadayag og kabalaka kon maaprobahan ba ang Clup sa konseho sa dili pa mosugod ang bag-ong administrasyon sa Hunyo 30.
Nagtuo si Garcia nga mas maayo nga maaprobahan sa kasamtangang konseho ang Clup tungod kay ang mga bag-ong konsehal, mabag-uhan sa ilang gimbuhaton.
Hinuon si City Council Secretariat Charisse Piramide nipahibawo ni Garcia nga sa kasamtangan ang Clup ubos na sa committee reports.
Nagkinahanglan pa hinuon kini og daghan'g lakang sama sa public hearing, second reading, ug third reading, sa dili pa kini hingpit aprobahan.
“We are hoping nga kani, ato untang maaprobahan,” matod ni Archival.
Naglaom sab si Archival nga maaprobahan ang gipangamahanan niyang ordinansahon ang solar panel system sa dili pa siya molingkod sa pagka mayor.
“If we’re going to put the solar panels sa tanan nga city-owned buildings, I’m very sure that we can bring down the cost of electricity and at the same time we’re helping the environment kay we have to reduce our carbon footprint,” pasabot ni Archival .
Ang solar panel ordinance nagpaabot na lang og public hearing sa konseho sa dili pa mopadayon sa second reading, third reading, ug sa approval. / JPS