NIHIMO dayon og lakang ang bag-ong napiling Mayor sa Sugbo nga si Nestor Archival aron makig-alayon sa Department of Public Works and Highways (DPWH) kalabot sa Pasil Fish Market.
Tumong niini nga masulbad ang dugay nang problema sa merkado sama sa wala mahuman nga konstruksyon, atop nga nagtulo, ug kahugaw.
Sa usa ka interview niadtong Martes, Hunyo 17, 2025, gibutyag ni Archival nga iyang pangitaon ang kontraktor nga naghimo sa merkado sanglit wala pa kini pormal nga natunol sa siyudad.
"Kung kinsa’y contractor, atong tan-awon kung nahuman na ba ning buildinga. Kung wala pa, atong ipahuman,” matod niya.
Atol sa iyang pagbisita sa Pasil Fish Market niadtong Hunyo 14, 2025, agi'g tubag sa hangyo sa mga manindahay nga susihon ang kahinlo, kondisyon sa dalan, ug trapiko, nakita ni Archival ang pipila ka mga problema nga angayan’g hatagan og dinaliang pagtagad.
Namatikdan niya nga daku ang buslot sa atop sa merkado, nga maoy hinungdan sa pagtulo sa tubig-ulan. Ang mga manindahay naningkamot na unta sa paghimo og temporaryo nga solusyon.
Gipadayag usab ni Archival ang iyang kabalaka sa kahinlo sa merkado, tungod sa hugaw nga tubig. Nakadungog siya og mga alegasyon (nga iyang pla-nong pamatud-an) nga ang mga manindahay naggamit kuno og tubig-dagat sa pagpanglimpyo.
"These are things nga unverified, so ato ng siguroon nga tinuod na,” ingon niya, ug midugang nga usa ka saktong drainage system ang iyang ipatan-aw sa maong lugar.
Gawas sa pisikal nga kahimtang sa merkado, nahimamat usab ni Archival ang nagkadaiyang manindahay, lakip ang mga wholesaler, retailer, ug "tappers" (middlemen).
Nasayran niya nga ang ubang manindahay wala pa makadawat sa ilang mga kontrata sa abang.
Kini nga isyu, kauban sa estruktura ug problema sa sanitasyon sa merkado, mao ang iyang tutokan dayon.
Sa unahan, gilatid ni Archival ang mga plano alang sa komprehensibo nga pagpaayo sa merkado, lakip ang hustong paglimpyo sa atop ug ang pagbutang sa usa ka episyente nga drainage system aron masulbad ang lapad nga kahugaw. / JPS