MOUMOL og working committee ang Kagamhanan sa Dakbayan sa Sugbo aron makig-alayon sa komitiba sa Kagamhanan sa Probinsiya sa Sugbo nga maoy motubag sa isyu sa 93-1 nga luna.
Mao kini ang gipahayag ni Mayor Nestor Archival niadtong Lunes, Hulyo 21, 2025.
Niadtong Dominggo, Hulyo 20, 2025, si Archival uban ni Bise Mayor Tomas Osmeña, nagkauban og panihapon ni Cebu Governor Pamela Baricuatro ug sa iyang bana.
Apan giklaro ni Archival sa usa ka press conference niadtong Lunes nga walay gihisgutan nga dagkong proyekto sama sa Cebu Bus Rapid
Transit ug sa 93-1 nga kasabutan.
Hinuon, iyang gipasiugda nga ang direksyon sa siyudad nagpabilin nga ipadayon ang pagpatuman sa 2016 land swap deal alang sa isyu sa 93-1 tali sa Kagamhanan sa Siyudad sa Sugbo ug sa Kagamhanan sa Probinsiya.
Ang memorandum of agreement nga gipirmahan ni kanhi mayor Tomas Osmeña ug kanhi gobernador Hilario Davide III nagtinguha sa pagsulbad sa dugay nang panaglalis sa
kapin sa 51 ka ektarya sa mga luna sa probinsiya nga nahimutang sa 11 ka barangay sa Cebu City — Busay, Luz, Lahug, Mabolo, Apas, Lorega, Kasambagan, Capitol Site, Tejero, Kamputhaw ug Kalunasan.
Si Archival atol sa iyang ikaduhang miting sa mga benepisyaryo sa 93-1 niadtong Sabado, Hulyo 19, maoy nagpahibalo sa pagmugna sa working committee.
Ang isyu sa 93-1 nagtumong sa usa ka ordinansa sa probinsiya niadtong 1993 (Provincial Ordinance No. 93-1) nga nagtugot sa mga residente sa mga luna nga gipanag-iya sa probinsiya sulod sa Cebu City nga makapanag-iya sa yuta nga ilang giokupar.
Apan, ang pagbalhin sa mga titulo nalangan sulod sa mga dekada tungod sa political deadlocks ug kakuwang sa mga guidelines.
Matod ni Archival, ang working committee sa siyudad makig-alayon na karon sa grupo sa Kapitolyo nga gipangulohan ni Gobernador Baricuatro aron masulbad ang nahabilin nga mga isyu. /EHP