NAKASAWAY si kanhi Cebu City mayor Raymond Alvin Garcia sa gipakatap nga ‘fake news’ sa giingong gipamalit nga customized shirts nga nagkantidad og P20,000 matag usa atol sa iyang administrasyon.
Iyang gihulagway ang maong akusasyon nga way basehanan ug politically motivated.
Kini agi og tubag ni Garcia sa isyu nga giluwatang pamahayag nila ni Mayor Nestor Archival ug Vice Mayor Tomas Osmeña, giingong kadudahang procurement items, lakip na ang giingong mahal nga mga sinina ug usa ka luxury BYD electric vehicle.
Gihagit ni Garcia ang maong mga opisyal nga mohikyad sa mga dukomento nga nagpamatuod sa ilang pangangkon.
Nidemanda si Garcia ngadto nila ni Archival ug Osmeña sa pagpangayo og pasaylo o mapugos siya sa pagsang-at og kasong criminal ug sibil lakip na ang cyber libel nga reklamo.
Samtang si Archival sa iyang bahin nagkanayon nga ang impormasyon kabahin sa giingong pagpamalit og sinina nga P20,000 matag gihulagway nga hilaw pa nga impormasyon o dili pa kumpirmado nga gipadangat lang niya atol sa paunang assessment labot sa operasyon ug pinansyal nga kahimtang sa siyudad sa nagpadayon nga transition.
“Kon ang ‘alleged’ is a fact, then mao na na nga mangayo ko'g pasaylo, pasayloa ko mayor, kay ang nahitabo ana, these are all raw, and these are not verified, and were all relayed to me,” matod pa ni Archival.
Apan wa bakwia ni Archival ang giingong moabot ngadto sa P2-3 bilyunes ang kuwang nga pundo sa siyudad dugang pa base sa verified nga report mokabat ngadto sa P6 bilyunes ang budget deficit. / EHP