Pabor si Cebu City Mayor-elect Nestor Archival nga ipabilin ang pagpahigayon sa Sinulog sa Cebu City Sports Center (CCSC) kaysa ibalhin sa South Road Properties (SRP).
Gipasabot ni Archival nga lisod adtuon sa mga tawo ang SRP aron motan-aw og Sinulog tungod kay dili tanan ang dunay sakyanan ug mas haom ang CCSC kay naa sa sentro.
Gitataw ni Archival nga ang naandan nga kasaulogan sa Sinulog nasentro sa kapistahan sa Sto. Niño.
Nagtuo siya nga ang mas maayo nga ipaduol sa Basilica Minore del Sto. Niño ang Sinulog tungod kay alang man sa Balaang Bata ang kapistahan.
Dihang gipangutana kon unsaon nga mas molambo ug monindot ang umaabot Sinulog, gipasabot ni Archival nga iya sab konsultahon ang ubang mga bag-ong pinili nga mga opisyal.
Iyang gisubli pagpahibalo ang iyang adbokasiya nga “collaborative” leadership, nga ang tanan nga mga desisyon ipaagi og konsultasyon sa uban.
Ang miaging Sinulog sa 2023 ug 2024 gihimo sa SRP, panahon sa administrasyon ni kanhi Mayor Michael Rama.
Sa pagpuli ni Mayor Raymond Alvin Garcia ang Sinulog 2025 gibalik sa CCSC.
Sayo niini si Garcia nipahibalo nga daghang mga dagko ug gagmay nga negusyante ang nalipay nga gibalik sa karaan nga lokasyon ang Sinulog ug punopuno ang mga hotel sa mga turista. / JPS