Human sa P4.4 milyones nga pagyagyag bahin sa mahalong electric vehicle (EV), laing kadudahan nga transaksyon ang mitumaw—mga t-shirt nga giingong nagkantidad og P20 mil matag usa.
Matud ni Cebu City Mayor Nestor Archival nga naglambigit kini sa usa ka mas lawom nga problema sa panalapi sa siyudad—usa ka gipaabot nga P2 ngadto sa P3 bilyones nga budget deficit—gumikan sa giingong dili regular nga mga transaksyon ubos sa miaging administrasyon, lakip na ang gitinguha nga pagpalit og P3.3 milyones nga luxury SUV nga gi-presyohan og P4.4 milyones.
Gisaway ni Cebu City Mayor Nestor Archival ang paggasto nga dili makatarunganon sanglit makaparalisa kini sa kapasidad sa panalapi sa siyudad—lakip na ang paghatag sa sweldo sa mga kawani.
“Kon mopalit ka og butang unya sobra ang presyo, usa ni siya sa rason nganong nag-anam kadako ang atong deficit because this is a waste of money,” matod ni Archival sa usa ka sideline interview sa mga tigbalita atol sa pilot waste segregation activity sa Barangay Luz niadtong Sabado, Hulyo 6.
Dugang pa niya nga ang gidaghanon sa kadudahan nga paggasto, kon dili mapugngan, moresulta sa daku nga alkanse.
“So, kung ingon ani kadaghan, usa ni siya sa rason nganong dako kaayo ta og deficit,” iyang gipunting.
Gibutyag ni Archival nga samtang ang P4.4 milyones nga electric SUV nagpabilin nga labing dayag nga red flag, ang iyang team nakadawat og preliminary reports nga nagtudlo sa ubang iregularidad, sama sa mga t-shirt nga giingong gipalit sa P20 mil matag usa.
Sa usa ka buwag nga pamahayag, si Bise Mayor Tomas Osmeña mipaambit sa Facebook nga nadiskubrehan ni Archival ang usa ka order alang sa mga t-shirt nga nagkantidad og P20,000 matag usa.
“Ang deficit karon anaa sa P3 bilyones ug magpadayon pa. Daghan pa nga dokumento ang nawala. Apan, nadiskubrehan ni Mayor Nestor Archival ang usa ka order alang sa mga t-shirt nga nagkantidad og P20 mil matag usa,” tipik sa iyang Facebook post.
Ang Sunstar Cebu nisuway og kuha sa pamahayag ni kanhi mayor Raymond Alvin Garcia mahitungod sa maong isyu pinaagi sa text niadtong Dominggo, Hulyo 6, apan wala pa kini motubag. / CDF