Lalaki nga gialarma nga armado ang gidakop sa mga sakop sa City Mobile Force Company (CMFC) sa Cebu City Police Office alas 5:50 sa buntag, Biyernes, Agusto 8, 2025 sa Kalunasan–Sapangdaku road, Barangay Guadalupe, Dakbayan sa Sugbo.
Ang nadakpan giila nga si Marlon Ytang Aballer, 29, taga Lungsod sa San Remigio.
Nakuha gikan kaniya ang kalibre .45 nga pistol ug magazine nga dunay tulo ka bala.
Ang buhatan sa CMFC nakadawat og tawag sa telepono nga dunay armado nga nasigpatan sa maong dapit nga maoy hinungdan nga dali nga niresponde ang mga sakop sa Special Weapons and Tactics ug Tactical Motorcycle Riding Unit sa pagpangulo sa hepe niini nga si Police Lieutenant Colonel Ferdinand Casiano.
Pag-abot sa SWAT personnel ilang naabtan ang suspek nga nagdala og armas hinungdan nga ila kining gidakop.
Kasong kalapasan sa Republic Act 10591 kun Illegal Possession of Firearms ang atubangon sa maong suspek. / AYB