Usa ka lalaki nga armado ang nadakpan sa kapulisan alas 12:20 sa kaadlawon, Biyernes, Hunyo 13, 2025 sa Sitio San Isidro, Barangay Mabolo, Siyudad sa Sugbo.
Ang suspek giila nga si Mitchelle Abellanosa Dosdos, 24, residente ra sab sa maong lugar.
Nakuha gikan kaniya ang usa ka kalibre 38 nga pistola nga dunay duha ka bala.
Sa imbestigasyon sa Mabolo Police Station, nasayran nga dunay nanawag kanila nga concerned citizen ug nipahibalo nga dunay armado nga tawo nga nagsuroy-suroy sa ilang lugar.
Dali nga niresponde ang mga polis ug ilang naabtan ang suspek nga dunay giluklok nga armas sa hawak niini nga maoy hinungdan nga ilang gidakop.
Kalapasan sa Republic Act 10591 kon Illegal Possession of Firearms ang atubangon nga kaso sa suspek. / AYB