Na-rescue sa kapulisan ang usa ka 15 anyos nga lalaki human nagdala og armas kay matod pa iyang pusilon iyang amahan niadtong alas 6 pasado sa buntag, Hunyo 20, 2025 sa Barangay Mambaling, dakbayan sa Sugbo.
Base sa taho sa Mambaling Police Station, usa ka concerned citizen ang mireport sa ilang buhatan human niya nakit-an ang maong menor de edad nga nagbitbit og armas.
Daling miresponde ang kapulisan sa lugar ug naabtan nila ang binatilyo ug narekober gikan sa iyang posisyon ang .38 nga pistola.
Miangkon ang batan-on nga gihuwaman niya ang armas sa iyang silingan kay matud iyang pusilon ang iyang kaugalingong amahan.
Sa dugang pakisusi, nasayran nga nilayas ang maong bata sa ilaha human gikasab-an kay di mosulod sa klase.
Sa oras ning pagsuwat, gi-turnover na sa kapulisan ang batan-on ngadto sa mga social worker. / JDG