Usa ka lalaki nga gi-report sa mga residente nga armado ang giposasan sa kapulisan sa Barangay Balud, lungsod sa San Fernando alas 3:15 sa hapon, Sabado, Hunyo 14, 2025.
Ang nabalhog sa San Fernando Police Station giila nga si Joulito Tabalda Candilanza, 54, taga Barangay Ilaya, lungsod sa San Fernando.
Nakuha gikan kaniya ang usa ka kalibre .38 Smith and Wesson revolver nga walay serial number, usa ka buhing bala ug usa ka basiyo niini.
Matud ni Police Major Michael Gingoyon, ang hepe sa San Fernando Police Station, nga alas 3:10 sa hapon nakadawat og tawag sa telepono ang ilang buhatan nga dunay armadong tawo nga nasigpatan sa Barangay Balud.
Dali nga miresponde ang iyang mga personnel ug mitakdo gyud ang 5 minute response time nga maoy gipatuman sa kapulisan ug ilang nadakpan ang suspek nga nagbitbit pa sa iyang armas.
Sa dihang gipangutana kun duna ba kini dala nga mga papeles wala kini makapakita nga maoy hinungdan nga gi-epekto dayon ang pagdakop kaniya.
Ipaubos sa background investigation sa San Fernando Police Station ang maong suspek aron sutaon kun duna ba kiniy laing kaso nga giatubang.
Kasong kalapasan sa Republic Act 10591 kun Comprehensive Firearms and Ammunition Regulation Act ang ipasaka sa kapulisan batok sa suspek. / AYB