Gisikop sa kapulisan ang usa ka habal-habal driver human naalarma ang mga residente sa Sityo Bato, Barangay Ermita, Dakbayan sa Sugbo kay nagdala-dala og armas alas 9 pasado sa gabii, Miyerkules, Agusto 5, 2026.
Kasong kalapasan sa Republic Act 10591 kun Comprehensive Firearms and Ammunition Regulation Act ang gipasaka batok sa 46-anyos nga suspek nga si Edwin Bruces Peregrino, taga Sityo Tarcom, Barangay Lahug sa maong dakbayan.
Nadawat sa Carbon Police Station ang taho nga dunay tawo nga nagdala-dala og armas sa naasoy nga dapit mga alas 9:25 sa gabii ug ila dayon kining girespondehan sa pagpangulo sa ilang hepe nga si Police Captain Venstine Ponce Bontilao.
Human sa singko minutos, malampusong nadakpan si Peregrino ug nakuha gikan sa iyang posisyon ang .38 revolver ug mga bala niini.
Gikataho nga wala makapakita og lisensya sa iyang armas ang suspek.
Ang dinakpan niingon nga gigamit niya ang armas isip pang self-defense. / JDG
