Tulo ka tawo ang nasakmitan og drugas ug armas sa gilusad nga buy-bust sa Toledo City Police Station nga gipangulohan sa hepe niini nga si Police Lieutenant Colonel Wilfredo Alarcon Jr., sa alas 2:02 sa kaadlawon sa Lunes, Mayo 26, 2025, sa Barangay Carmen sa maong dakbayan.
Ang mga nadakpan mao silang Dennis Tapanan Tura, 34, taga Sitio Harden, Barangay Carmen nga maoy target sa operasyon ug ang iyang bata-bata nga si Harazem PacaƱa Navarro, 34, taga Sitio Bawod, Barangay Don Juan Climaco Sr., Dakbayan sa Toledo.
Ang duha nakuhaan og mga pinutos sa gituohang shabu nga motimbang sa 0.54 gramos nga dunay kantidad nga P3,672.
Lakip sa nadakpan si Janrey Rosal Ferrer, 26, nga taga Carbon Barracks, Barangay Ermita, Dakbayan sa Sugbo apan kasamtangan nga nagpuyo sa Barangay Cantabaco, Siyudad sa Toledo.
Nakuha gikan kaniya og usa ka putos sa gituohan'g shabu ug armas nga giluklok sa iyang hawak.
Matod ni Alarcon nga atol sa transaction, nagkuyog silang duha si Tura ug si Navarro ug naatol sab nga naa sa lugar si Ferrer hinungdan nga ilang giapil og rekisa ug nakuhaan og ilegal nga drugas ug armas.
Una na nga gi-monitor sa mga sakop sa Toledo City Police Station silang Tura ug Navarro human nigawas ang ilang mga pangalan nga nalambigit sa pagpamaligya og ilegal nga drugas.
Mohimo karon og lawom nga imbestigasyon ang Toledo City PNP kang Ferrer kon siya ba ang nag-supply sa illegal nga drugas ngadto kang Tura ug Navarro.
Si Tura nabilanggo na kaniadto sa kasong murder ug bag-o lang nakagawas samtang si Navarro napriso na sab sa kaso sa ilegal nga drugas ug gipaubos pa sa probation. / AYB