Nakuhaan og pistola ang usa ka 14-anyos nga tinun-an sa Grade 9 sa Lut-od National High School sa Lungsod sa Pinamungajan, alas 3:50 sa hapon, Huwebes, Agusto 20, 2026.
Ang maong tinun-an nga residente sa Purok Santol, Barangay Lut-od, kasamtangang giatiman sa iyang apohan samtang ang iyang inahan nagtrabaho sa Dakbayan sa Sugbo ug ang amahan tua sa kaulohan.
Base sa imbestigasyon sa Pinamungajan Municipal Police Station, nag-inspeksyon ang class adviser sa mga bag sa iyang mga estudyante dihang nadiskubrehan ang armas sa bag sa maong menor de edad.
Dali nga nanawag ang magtutudlo nga si Gliecia Mae Ig-agao sa kapulisan aron matugyan ang armas ug mapaubos sa intervention ang bata.
Niresponde gilayon ang mga sakop sa Women and Children Protection Desk (WCPD) aron maasikaso ang tinun-an. Sa ilang pag-abot, nasuta nga ang armas usa ka .357 Smith & Wesson Magnum revolver.
Nitug-an ang bata nga gipanag-iya sa iyang apohan ang armas nga gibutang ra sa kabinet sa ilang balay, diin iyang gikuha ug gidala sa eskwelahan.
Human sa imbestigasyon ug dokumentasyon, gitugyan na sa kapulisan ang 14-anyos ngadto sa Municipal Social Welfare and Development Office (MSWDO) alang sa social intervention.
Si Samson Layar, ang utility sa maong tunghaan, nitug-an atol sa interbyu sa media nga ang tinun-an nga nakuhaan og armas wala ni mosulod sa buntag nga klase.
Nisulod ni sa eskwelahan niana nang udto kay abli na ang campus ug wala na sab masusi ang mga bag sa mga estudyante.
“Kana siya wala na moeskwela sa buntag, kining (gate) open man ni mosud-gawas ang mga bata kay mokaon man. 'Nya mao to nag-inspection sila sa bag didto nag-surprise inspection, mao to naay armas nakita,” matod ni Layar.
Si Layar sab ang mosusi sa dala sa mga bag sa mga estudyante inig ka buntag subay sa gipahugtan nila nga seguridad sa eskwelahan.
Ang classmate sa 14-anyos nga tinun-an nitug-an kon unsay batasan niini sa ilang klase.
Matod ni May nga badlongon matod pa kini ug kanunay lang mag-cutting classes ug labaw sa tanan magtubag-tubag sa ilang maestra.
“Magtubag-tubag man na siya ni ma'am” matod ni May. / AYB, ABC