Girumbo sa mga sakop sa Compostela Municipal Police Station ang balay sa usa ka drug personality nga nadakpan na kaniadto, pinasikad sa search warrant.
Ang pagronda gipahigayon niadtong alas 6:45 sa buntag niadtong Biyernes, Mayo 23, 2025 sa Purok Mangga, Sitio Danikop, Barangay Basak, Compostela.
Apan ang tag-iya sa balay nga maoy subject sa search warrant ang nakasibat ug ang duha lang ka caretaker ang naabtan sa mga polis.
Ang mga nasikop mao sila si Renan Malabon, 21, taga Purok Mahogany, Barangay Lupa, Comostela ug Allien Tungal Ochea, 37, taga Purok Kawayan, Barangay Basak sa maong lungsod, samtang ang subject sa search warrant nga si Reynaldo Laguna Lucero ang nakaikyas.
EBIDENSIYA
Nakuha sa mga operatiba ang usa ka 9mm KG9 machine pistol, usa ka shotgun, usa ka 9mm revolver nga walay mga serial numbers ug mga magazine, lakip na ang kapin sa 100 nga bala sa lain-laing kalibre.
Sa pagpadayong pagsiksik sa balay nakakuha pa ang kapulisan og usa ka dakong putos ug walo ka medium packs sa gituohang shabu nga motimbang sa 219 gramos nga dunay standard drug price nga P1,883,400.
Matod ni Police Captain Lino Galvan III, officer in charge sa Compostela MPS nga ang ilang pagpang ronda pinasikad kini sa search warrant nga giluwatan ni Judge Lucila M. Cad-Enjambre, Presiding Judge sa RTC Branch 89, Mandaue Citynga pinitsahan niadtong Mayo 19, 2025 sa kasong sa Republic Act 10591 kon Comprehensive Firearms and Ammunition Regulation Act.
Gibutyag ni Galvan nga ang ilang target sa operation anaa sa watchlist sa Barangay Drug Abuse Council ug migawas usab ang iyang pangalan gikan sa ilang mga dinakpan nga giingong maoy tinubdan sa illegal nga drugas.
Usa sa nadakpan nga caretaker nga tig-lawog sa mga manok nga binuhi sa ilang amo, nitug-an nga ang armas nagsilbing pang-self defense sa iyang amo batok sa karibal niini sa pagpamaligya og shabu.
Ang maong subject sa warrant gikataho sab nga mamaligya og armas. / AYB