Naghay-ad ug nagkadugo na nga napalgan ang 15-anyos nga lalaki sulod sa ilang balay sa Barangay Marigondon, Dakbayan sa Lapu-Lapu sa alas 5:00 sa buntag.
Base sa pasiunang imbestigasyon sa kapulisan sa Lapu-Lapu nga ang maong batan-on nga tinun-an sa Grade 10 adunay samad pinusilan sa iyang ulo.
Si Police Lieutenant Colonel Christian Torres, tigpamaba sa Lapu-Lapu City Police Office (LCPO) nibutyag nga base sa ilang nakuha nga impormasyon nga naabtan nga diha sa lawas sa batan-on ang kalibre 45 nga armas.
Ang maong pusil gipanag-iya sa iyang amahan nga usa ka sakop sa Philippine National Police (PNP) nga nadestino sa Lapu-Lapu City Police Office.
Sa pagsusi sa medical team, patay na ang maong batan-on.
Nidugang si Torres nga sa ilang dugang pakisusi, ang amahan sa biktima nga usa ka Police Master Sergeant nitug-an nga sa wala pa nahitabo ang insidente, nasultihan ang maong batan-on sa iyang ginikanan tungod kay nakadlawnan sa pagpauli ug sayo pa sa buntag ang klase niini.
Niasoy sab ang amahan nga tungod sa kahilumon sa iyang anak, posible nga giluom niini ang ilang mga pagmaymay ngadto niya.
Nasayran nga ang maong armas gitago sulod sa drawer nga adunay kandado, apan giingong giligwat ang kandado hinungdan nga naabli niini ang hunos.
Gikataho nga walay nakita nga foul play sa maong panghitabo apan gimanduan ang mga imbestigador nga susihon sab kon wala bay tulobagon ang amahan sa posible nga pagpabaya sa iyang armas.
Ang LCPO nagpaabot pa sa resulta sa forensic analysis.
HOTLINE
Sa kadtong nag-antos og depression ang Philippine Mental Health Association, Inc. Cebu Chapter nagtanyag og online psychiatric ug psychological services. Mamahimong matawgan ang mga mental health professional sa mobile number nga 0917-655-0023; pmhacebu1950@gmail.com, sa adlaw’ng Lunes ngadto sa Biyernes, 8AM-5PM.
Mamahimo sab nga tawagan ang Tawag Paglaum Centro Bisaya, 24/7 call-based hotline alang sa suicide prevention ug emotional crisis sa numero 0939-937-5433; 0939-936-5433 ug 0927-654-1629. /