Gibalhog sa prisohan ang usa ka 63-anyos nga inahan human niya gitaguan sa iyang panty ang usa ka kalibre .45 nga pistola sa iyang anak atol sa pagpatuman og search warrant batok sa anak alas 12:30 sa udto niadtong Dominggo, Agusto 23, 2026, sa Barangay Balungag, Lungsod sa San Fernando.
Gitanggong sa San Fernando Police Station ang inahan nga si Anastacia Oacan Escultor kinsa mag-atubang og kasong Obstruction of Justice. Samtang ang iyang anak nga maoy subject sa search warrant nga si Ryan Oacan Escultor, usa ka drayber ug nailang badlungon sa maong lugar, wala madakpi.
Sumala ni Police Chief Master Sgt. Marven Ando, imbestigador sa San Fernando Police Station, gipagawas sa korte ang search warrant human makadawat og daghang reklamo gikan sa kapitan ug mga silingan batok ni Ryan. Giingong magpabuto siya og armas ug manghasi kon mahubog, diin katapusan niyang gipasalbahan ang mismong mga ginikanan sa ilang barangay kapitan.
Atol sa pag-abot sa kapulisan ug mga opisyal sa barangay, wala diha si Ryan apan naa ang iyang inahan ug mga kabanay.
Sa wala pa makasulod ang mga awtoridad sa balay, dali nga gikuha sa inahan ang pistola ug gipasok kini sa iyang panty dungan sa paggawas ug paglingkod sa terrace.
Samtang gipahigayon ang search sulod sa panimalay, nakamatikod ang mga polis nga wala mahimutang, nagkurog, ug nangluspad si Anastacia.
Nipasangil siya nga gipanuhot ug nagpasakit-sakit sa tiyan kay dili mobarog.
Tungod sa kadudahan nga lihok, gihangyo sa kapulisan ang usa ka babaye nga rekisahon ang inahan. Dito na nadiskobrehan ang pistola nga adunay unom ka bala nga gitaguan sa iyang bilahan.
Gibutyag ni Ando nga naratol ug nahadlok ang inahan nga matagak ang armas kon mobarog siya.
Gipahayag sa inahan ang iyang pagmahay ug niangkon nga nahimo niya kadto tungod sa kaluoy sa iyang anak aron dili kini mapriso. / GPL
