Asawa gi-hostage sa bana, nakalingkawas
Asawa gi-hostage sa iyang bana alas 5:40 sa kaadlawon, Martes, Abril 29, 2025, sulod sa ilang panimalay sa Barangay Cambitoon, Lungsod sa Inabangga, Bohol.
Gusto sa bana nga si alyas Gino, 55, construction worker nga paundangon sa iyang trabaho isip katabang sa usa ka pamilya ang iyang asawa nga si alyas Mirasol, 45.
Nahitabo ang init nga panaglalis nga niresulta sa pag-hostage sa bana sa iyang asawa.
Ang kapitan sa Barangay Cambitoon maoy nagpaalarma sa kapulisan sa Inabangga tungod sa insidente.
Dali nga niresponde ang mga polis pinangulohan sa ilang hepe nga si Police Captain Albert Sator hinungdan sa pagkasikop sa suspek.
Naabtan sa kapulisan ang suspek nga nagdala og hait nga lagaraw ug gisuwayan paghangyo nga itahan kini apan nilugnot na hinuon siya.
Nabuhian sa bana ang iyang asawa apan imbes nga mo-surrender, gitigbas hinuon ang iyang kaugalingong ulo nga maoy hinungdan nga nasamad.
Dali nga gidala sa Dagohoy Memorial Hospital ang suspek ug human matambali ang iyang samad, gidala siya sa police station.
Base sa imbestigasyon sa kapulisan nga gusto na sa suspek nga paundangon sa trabaho ang iyang asawa nga mao ang pagbantay og bata kay siya na lang ang mobuhi niini.
Apan nagdumili ang asawa tungod kay kuwang ra ang suweldo sa bana isip construction worker hinungdan nga nag-wild ang suspek.
Nikuha si Gino sa iyang bag-ong binaid nga lagaraw ug gihadlok sa iyang asawa hinungdan nga ang mga silingan nanawag og panabang.
Kasong kalapasan sa Article 151 sa Revised Penal Code o alarm and scandal ang atubangon nga kaso sa suspek. / AYB