PATAY ang asawa human gidunggab sa iya ra sab nga bana samtang nag-ilis sa kuwarto sa ilang balay sa Sitio Mangga, Barangay Bahay, Lungsod sa Sibonga sa alas 6:00 pasado sa buntag, Hulyo 23, 2025.
Ang biktima giila nga si Catherine Sentillas, 41, ug niadtong lang Hulyo 3, 2025, nauli gikan sa Saudi Arabia isip usa ka domestic helper.
Ang Sibonga Police Station gipahibalo sa taga ospital sa mga alas 6:30 sa buntag nga gidala ang biktima kay nadunggaban.
Base sa imbestigasyon sa kapulisan nga sa ala 6:05 sa buntag ang biktima gidunggab gamit ang kitchen knife tumong sa iyang tiyan.
Ang suspek nga iyang bana giila nga si Benjamin Sentillas, 47.
Sigon sa 17-anyos nga anak sa biktima nga si Troy nga samtang nag-ilis iyang inahan sa kuwarto kay adunay lakaw, kalit lang nga gidunggab sa iyang amahan.
Human sa pagpanunggab, nidagan ang suspek sa gawas ug nagdunggab sa iyang kaugalingon sulod sa makaduha ka higayon diha sa iyang tiyan.
Ang biktima ug suspek dungan nga gidala sa ospital.
Matod ni Police Major Niño Lawrence Ibo, hepe sa Sibonga Police Station nga selos ang hinungdan sa pagpanunggab kay nagsige og duda ang bana nga adunay laing laki nga gikabuangan ang iyang asawa.
Nakuha sa kapulisan ang kutsilyo nga gigamit.
Atol niining pagsuwat, ang suspek padayon pa nga giatiman sa mga mananambal apan gipaubos sa hospital arrest ug mag-atubang og kasong parricide. / JDG