Gideklarar sa Negros Occidental Provincial Veterinary Office nga “kontrolado na” ang mga kaso sa African swine fever ug hog cholera sa probinsiya.
Ang Provincial Veterinarian nga si Dr. Placeda Lemana niingon sa Huwebes, Enero 4, “dili pa nato ideklara nga ang probinsiya nga ASF ug hog cholera free tungod kay ang hog cholera usa ka endemikong sakit, samtang ang ASF naa sa kinaiyahan.”
Gipasiugda ni Lemana nga ang pagdili sa pagsulod sa mga buhi’ng baboy ug mga processed pork products ngadto sa Negros Occidental gikan sa apektadong mga lugar nagpabilin aron mapanalipdan ang probinsiya, ug midugang aron “makabalik dayon kita sa atong status nga ASF-free.”
Si Lemana niingon usab nga posibleng mobalik ang presyo sa baboy sa karaan nga presyo sa third quarter o fourth quarter sa miaging tuig, sa wala pa ang hog cholera ug ASF outbreak sa probinsiya.
Sa pagkakaron, anaa na sa P360 matag kilo ang presyo sa baboy.
Gipasalig ni Lemana sa publiko nga adunay igong suplay sa baboy ug dressed chicken sa probinsiya.
Siya niingon nga ang probinsiya mao gihapon ang numero uno sa Kasadpang Kabisay-an bahin sa pork supplier ug sunod sa Batangas sa nasod.
Sa laing bahin, si Lemana miingon nga opisyal nga sugdan karong tuiga ang pagbantay sa industriya sa baboy, bisan pa nga ang pipila ka mga hog raisers nagsugod na sa katapusang kwarter sa 2023 ug nga wala nay namatay nga baboy nga gitaho niadtong panahuna.