Bugtong Pinoy si Gerwin Asilo nga mopakita og aksyon sa duha ka sunodsunod nga dagkong boxing promotions nga ipahigayon sa Tokyo, Japan karong Oktubre 13-14, 2024 diin walo ka championship bouts ang masaksihan.
Sa ikaduhang adlaw sa kalihukan, si Asilo, kinsa lumad nga taga Ubay, Bohol, makigbatok ni Japanese up-and-comer Tenshin Nasukawa alang sa inilugay sa bakanteng World Boxing Organization (WBO) Asia-Pacific bantamweight belt sa Ariake Arena.
Ang wala’y pildeng si Asilo mosagubang ning awaya nga adunay taas nga morale tungod kay nakadaog kini og regional titles sa niagi niyang duha ka mga away.
Naangkon niya ang bakanteng World Boxing Organization (WBO) Asia-Pacific Youth bantamweight belt pinaagi sa unanimous decision nga kadaugan batok ni Aljum Pelecio niadtong Disyembre 23, 2023.
Gisundan kini niya og makapaukyab nga second-round knockout nga kadaugan batok ni Thai Surat Eaim Ong sa inilugay sa bakanteng WBO Oriental bantamweight title niadtong hulyo 27, 2024, sa Bohol.
Si Asilo kasamtangang hugot nga nagbansaybansay sa Villamor Boxing Gym sa Mandaue City ubos sa paggiya sa bantugang trainer nga si Edito “Ala” Villamor.
Naggunit si Asilo og 9-0, 4KOs nga rekord samtang si Nasukawa adunay 4-0, 2KOs nga baraha. / EKA