Atleta sa Mandaue City dunay cash incentives

Atleta sa Mandaue City dunay cash incentives
Mandaue City Hall (File photo: Mandaue City Public Information Office)

Kapin sa 100 ka mga atleta gikan sa Mandaue City nga nangandam alang sa Palarong Pambansa gikatakdang maka­dawat og cash incentives gikan sa City Government isip ganti sa ilang pagsalmot.

Kini isip pagpadayon sa tradisyon sa Dakbayan sa pagsuporta sa mga atleta niini, nunot sa P198,000 nga nahatag sa miaging tuig alang sa samang katuyoan.

Gisulayan sa SunStar Cebu nga makuha ang kinatibuk-ang kantidad nga gigahin alang sa mga insentibo karong tuiga, apan, ang mga text message ug mga pagsulay sa pagtawag ngadto kang Mandaue City Sports Commissioner Mary Joy Tabal nagpabilin nga wala matubag sa pagsuwat ning balita.

Hinuon, si Department of Education Mandaue Superintendent Bianito Dagatan nipasalig nga makadawat og cash reward ang mga atleta bisan unsa pa ang resulta sa ilang performance.

Ang Mandaue City mopadala og mga delegado nga mosalmot sa basketball, futsal, boxing, swimming, PARA games, athletics, ug archery events sa Palarong Pambansa 2024 karong buwana.

Sa miaging report sa SunStar Cebu sa 2023 regional competitions, gidetalye nga ang mga mananaug nga atleta gikan sa Mandaue City makadawat og P10,000 sa matag gold medal, P7,000 sa silver, ug P5,000 sa bronze. Sa national competitions, ang insentibo mosaka ngadto sa P15,000 alang sa gold medal, P10,000 sa silver, ug P7,000 sa bronze.

Kini nga mga insentibo nagtumong sa pag-ila ug pagsuporta sa mga nahimo sa mga atleta sa lokal ug internasyonal.

Matod ni Dagatan nga unom ka buwan nang nangandam ang mga atleta ug padayong nagbansaybansay pag-ayo.

Aron makadawat sa ilang cash gifts, ang mga atleta ug ilang mga coach kinahanglan lang nga mo-report sa Mandaue Sports Commission nga dunay sertipikasyon nga magpamatuod sa ilang kahimtang isip mga atleta sa Mandaue.

Ang mga atleta gikatakdang mo-report sa ilang billeting quarters sa Don Vicente Rama Memorial National High School sa N. Bacalso Avenue duha ka adlaw sa dili pa ang Palaro.

Samtang sila ang nagrepresentar sa Central Visayas, ang Mandaue City dunay ikaduhang labing taas nga gidaghanon sa mga atleta sa regional delegation, sunod sa Cebu City.

Samtang, ang Mandaue City Sports Complex maoy host sa Arnis event sa Palaro.

Ang mga delegado sa Palaro gilauman nga moabot tali sa Hulyo 1-5, nga adunay welcome dinner nga gikatakda sa Hulyo 7.

Ang Palarong Pambansa mopakita og grand athletes’ parade sa Osmeña Blvd. paingon sa Cebu City Sports Center karong Hulyo 9.

Isip kabahin sa delegasyon sa Rehiyon VII, andam ang mga atleta sa Mandaue nga moduyog sa ilang mga kauban sa pagpakita sa ilang mga talento ug pagpaningkamot alang sa kahawod sa nasudnong lebel. / CAV

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph