Nipasaka og mga reklamo niadtong Huwebes, Hulyo 3, 2025, ang negosyante ug gaming tycoon nga si Charlie “Atong” Ang batok sa duha sa iyang kanhi sinaligan nga mga empleyado, apil na si Julie “Dondon” Patidongan kinsa maoy nihingalan kaniya isip utok sa pagkawala sa kapin 100 ka mga sabungero.
Si Ang inubanan sa iyang legal counsel nga si Lawyer Lorna Kapunan, nipasaka og mga reklamo alang sa grave threats, grave coercion, slander, conspiracy to commit attempted robbery with violence against or intimidation of a person ubos sa Article 294 sa Revised Penal Code (RPC), ug alang sa incriminating innocent persons ubos sa Article 363 sa RPC, batok kang Patidongan ug Alan Bantiles, alyas “Brown,” sa Mandaluyong City Prosecutor’s Office.
Sa iyang complaint affidavit, gibutyag ni Ang nga si Patidongan maoy farm manager sa Pitmaster Group.
Matod niya, ang responsibilidad ni Patidongan nikaylap sa tanang lokasyon diin gipahigayon ang mga sabong, ilabi na sa Lipa, Batangas, Sta. Cruz, Laguna, ug Sta. Ana, Manila.
Niadtong Miyerkules, Hulyo 2, si Patidongan sa usa ka exclusive interview sa GMA News, nagtumbok kang
Ang isip utok sa pagdagit ug pagpatay sa kapin 100 ka sabungero nga giingong nanikas.
Ginganlan sab niya ang aktres nga si Gretchen Barretto, Eric dela Rosa, ug Engr. Celso Salazar nga apil sa kaso sa mga nawala nga sabungero.
Gipadayag ni Patidongan nga gitanyagan siya og P300 milyunes sa kampo ni Ang aron bakwion ang iyang mga pamahayag apan iya kining gibalibaran.
Si Patidongan kinsa nagsilbi isip bodyguard ni Ang sulod sa 15 ka tuig sa wala pa nahimong hepe sa seguridad sa tanan niyang operasyon niingon nga si Ang ang adunay overall authority.
“Mr. Atong Ang, Eric Dela Rosa, Engineer Celso Salazar, they are the masterminds behind the missing sabungeros, they are the brains of it all,” matod ni Patidongan.
“Eric Dela Rosa monitors the fights, if he knows someone is cheating [‘tyope’], he informs Mr. Atong Ang, then they will talk to Celso Salazar, and then they call me to hold the people who are cheating,” dugang niya.
“He is the one who orders to eliminate them [‘iligpit ang mga yan’]. There are members of the PNP (Philippine National Police) who are ordered to pick them up from the venue,” sumala ni Patidongan.
Sa usa ka press conference human gipasaka ang mga reklamo, niingon si Ang nga ang gamot sa tanang akusasyon batok kaniya mao ang kuwarta. / TPM / SunStar Philippines