Naangol ang usa ka drayber human siya nabangga sa kilid sa flyover sa Brgy. Mambaling, siyudad sa Sugbo sa mga alas 5 sa buntag sa Biyernes, Abril 5 samtang nagmaneho sa iyang awto.
Ang biktima nga nahilandig sa tambalanan giila pinaagi sa iyang driver’s license nga si Renante Cuabo, 40, taga Brgy. Gabi, Cordova, Cebu.
Sa interbyo sa Superbalita Cebu kang Cebu City Traffic Police investigator P/Staff Sgt. Lito Busalanan, nahibaw-an nga si Cuabo gikan sa south nga nagmaniho sa iyang awto padulong sa north, hayan padulong mouli sa Cordova agi sa South Road Properties (SRP).
Apan pag-abot sa likuanan padulong sa SRP, naalanganin ang biktima, nasangit ang iyang sakyanan sa kongkretong barrier sa tiilan sa flyover.
Si Cuabo naangol kay namumo ang baba sa manobila sa iyang awto kay wa nigana ang air bag.
Dali siyang gidala sa tambalanan sa Cebu City Disaster Risk Reduction and Management Office. / DVG