Awto naguba tungod sa baka

SunStar Medellin
SunStar Medellin

Awto naguba kay nakadasmag sa baka nga nilabang sa karsada alas 6:45 sa buntag, Miyerkules, Hunyo 26, 2024, sa Barangy Dalingding Sur, lungsod sa Medellin, Cebu.

Ang upat ka buwan nga baka nakaangkon og mga pangos ug bun-og.

Si Major Timothy Jim Romanillos, hepe sa Medellin Police Station nga nahinabi sa Superbalita Cebu, nibutyag nga ang awto gimaniho ni Ethel Faelnar, 40, minyo, kawani sa 3rd Municipal Circuit Trial Court (MCTC) San Remegio, Medellin, Daanbantayan nga taga-Poblacion, Medellin.

Si Faelnar, sakay sa iyang Mitsubishi Mirage Sedan.

Matud ni Romanillos, ang caretaker sa baka nga si Princess Mia Formentera, 24, ang padulong motugway sa inahan sa baka.

Giguroy niya ang inahan nga baka nga gihigtag pisi samtang ang upat ka buwan nga nati nga baka, ang nagsunod.

Milabang sila sa karsada ug nakaabot sa atbang nga dalan apan ang nati nga nagsunod, kalit nga mibalik sa iyang agi.

Akto nga si Faelnar, sakay sa iyang sakyanan padulong sa Proper Medellin ug wa gilayon makabantay hinungdan nga nadasmagan ang nati nga baka.

Ang awto maayong pagkaguba sa walang bahin niini ug maayo na lang nga wa maunsa ang drayber human sa insidente.

“Wala magdahom si Faelnar, nga kalit mobalik sa agi ang anak sa baka, midagan nadasgan hi­nuon,” dugang ni Romanillos.

Ang caretaker nagtuo sab nga naa ra sa likod ang nati ug nakugang kini dihang kalit nga milagubo.

Si Faelnar ug ang tag-iya sa baka nga si Praise Faith Diva Lingaro, nagkasabot nga dili na mo-claim sa matag danyos sanglit disgrasya ang nahitabo.

Bisan sa kakusog sa impact, dili ra grabe ang kadaot sa nati nga baka. / GPL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph