Gituohang nakainom og ilimnong makahubog ang drayber nga langyaw samtang nagmaneho sa awto nga ilang giabangan nga nahulog sa kimba mga alas 3 sa hapon sa Lunes, Enero 8, sa Sityo Tayong, Brgy. Guibuangan, lungsod sa Barili, habagatang kasadpang Sugbo.
Namatay diha-diha ang usa ka babayeng Russian national ug naangol ang iyang mga kauban nga duha ka mga lalaking Russian tungod sa pagka aksidente sa kolor puwa nga Toyota Vios.
Ang kapulisan sa Barili nga gipangulohan sa ilang deputy chief nga si P/ Capt. Crisanto G. Arreglo daling niresponde sa dihang ilang na hibaw-an ang aksidente gikan sa usa ka concerned citizen.
Sa interbyo sa Superbalita Cebu kang Police Major Janus O. Giangan, nasuta nga ang awto iya ni Elsie Magallanes, taga Marigondon, Siyudad sa Lapu-Lapu.
Giabangan ug gimaniho kini ni Lurii Sergeevich Samminskii, 45, usa sa duha nga naangol.
Iyang mga sakay sila si Georgii Arcehob/Aksesenov, 42, kinsa naangol ug si Inna Akcehoba/ Aksenova, 43, kinsa namatay.
Matod pa ni Giangan nga ang mga biktima gikan sa lungsod sa Moalboal ug mopauli na padung sa dakbayan sa Sugbo.
Apan pag-abot sa kurbadahong bahin sa dan, wa kini kaliko ug didto nahagbong sa pangpang nga mga 200 feet ang giladmon.
Nabalitok nga nauna ang lubot sa awto ug nahayang sa pagtugpa.
Ang duha ka mga pasahero sa backseat naglingkod.
Sa kakusog sa impact, si Inna nakaangkon og grabeng mga samad sa ulo ug giingon nga nabali ang kabukogan.
Ang duha ka mga lalaking Russian gidala sa Barili District Hospital.
Si Giangan nagduda nga hubog ang drayber kay may nakit-an sila nga tulo ka mga botelya sa beer sulod sa sakyanan.