Nag-atubang og disqualification nga reklamo ngadto sa buhatan sa Commission on Elections ang kanhi mayor sa Tagbilaran City, Bohol nga si John Geesnell “Baba” Yap II human makuhaan og video nga nisaad nga mohatag og kwarta sa mga botante.
Ang gihimo sa kanhi mayor gikonsiderar nga usa ka vote-buying nga kalapasan sa Omnibus Election Code.
Niduso og joint affidavit ang lima ka mga residente nga rehistradong botante sa Barangay Bil-isan, Lungsod sa Panglao, Bohol.
Si Yap kinsa nikandidato pagka kongresista sa unang distrito sa Probinsyia sa Bohol sa nagsingabot nga eleksyon sa Mayo 12, 2025, gipasanginlan nga nihaylo og kwarta bugti sa makuha niya nga boto atol sa iyang pagpangampanya diin nakuhaan kini og video.
Ang mga reklamante nga silang Alfeo Estologa Usaraga, Albert Guibone Bompat, Renato Aronales Sarahina, Olimpio Bonao Bompat ug Ursula Hormachuelos Bompat nipamatuod ug nanumpa nga nakakita sila sa maong video nga gi-post sa Facebook page sa “Voice of Boholanon” niadtong Abril 26, 2025.
“Duhang buwan gikan karon, mobalik sa Baba Yap, singko mil (P5,000) ako ihatag pero og senior citizen, baynte mil (P20,000) ako ihatag, naay senior nga nipakpak sa likod oh!,” nagkanayon si Yap sa video.
Ang mga reklamante nibutyag nga ang maong pamahayag matod pa nag-aghat sa mga botante pagbotar kaniya nga usa ka kalapasan sa Omnibus Election Code nga nagdili sa pagpalit og boto.
Ang maong video makita pa gihapon sa Facebook nga maoy gihimong ebidensya sa mga reklamante.
Dugang sa mga reklamante nga ang maong video tinuod, dili hinimuhimo ug takdo sa nahitabong pagpangampanya sa Panglao.
Sa pinanumpaang pamahayag sa mga reklamante, ilang gipa-authenticate ang maong video isip ebidensya pagmatuod sa accuracy niini.
Ang maong mga dokumento gipirmahan atubangan sa notary public sa Dakbayan sa Tagbilaran.
Kon mapamatud-an nga sad-an sa kasong pagpalit og boto si Yap, mamahimo siya’ng ma-disqualify ubos sa Section 68 sa Omnibus Election Code. / AYB