Naalarma ang Talamban Police Station labot sa post sa social media sa usa ka Adriel Yap nga nag saysay nga dunay nahitabong pagdagit sa usa ka babaye sa gawas sa University of San Carlos (USC) Talamban Campus atbang sa Family Park niadtong Dominggo sa hapon, Enero 26, 2025.
Ang maong babaye iyang gibanabana nga naa sa 20 ang pangidaron nga nag-atang nga mosakay og bus nga Beep nga iya usab nga gisakyan.
"Apan dunay usa ka auto nga color puti nga nagdala sa plate number nga (numero sa plaka gipugngan) ang kalit lang nga mihunong ug dunay duha ka lalaki nga naka-mask ug ningpugos sa pagpasakay sa maong biktima," saysay sa post ni Yap.
"Bisan sa pagsyagit niini, wala matod pay bisan usa nga mitabang nga mga tawo sa dapit ug mipadagan kini dayong liko sa dalan nga padung sa Cabancalan sa siyudad sa Mandaue," dugang ni Yap.
Ang hepe sa Talamban Police Station nga si P/Major Alvino Enguito nibutyag nga nakadawat usab sila sa maong post sa social media nga tungod niini, nimando dayon siya sa iyang mga imbestigador nga mosusi sa maong report.
Apan sa pagpangutana sa mga security guard sa dapit, lakip na sa mga tawo, wala sila makamatikod nga dunay nahitabong komusyon o dunay babaye nga nisyagit kay gipugos sa pagpasakay sa usa ka awto.
Gipangsusi na usab ang mga CCTV camera sa dapit diin gibutyag sa nag-post sa social media kon asa nahitabo ang giingong pagpanagit sa usa ka babaye.
"Ato na nga gipasusi didto pero ang mga tawo didto wala man makabantay nga naay ingun ana nga estorya, atoa na pud gipangsubay ang mga CCTV camera kung duna bay gyuy kasikas didto," matod ni Enguito.
Gikontak na usab nila ang nag-post niini sa social media apan gipahibawo ni Enguito nga gi-delete na ni Yap ang iyang post.
Hinuon, naka-screenshot sila sa post niini nga mahimo gihapon nga masubay kini nga kaso. / AYB