Babaye gidunggab sa laing babaye, patay tungod sa bata

Babaye gidunggab sa laing babaye, patay tungod sa bata
NAPRISO: Kini ang ginang nga napriso human nidunggab-patay sa silingang nga babaye sa Lower Timbahan, Brgy. Can-asujan, Siyudad sa Carcar, habagatang Sugbo sa Miyerkules sa hapon, Hunyo 12, 2024. / TAMPO

Nisangpot sa pagdunggab-patay ang paglinabanay sa away sa ilang mga anak tungod sa bisiklita sa Lower Timbahan, Brgy. Can-asujan, Siyudad sa Carcar, habagatang Sugbo sa Miyerkules sa hapon, Hunyo 12, 2024.

Ang suspek ug biktima duna nay daan nga kasungian tungod sa giingon nga gipalakaw nga mga tsismis.

Ang biktima mao si Rosene Roloma Codeñera, 36, minyo, apan buwag sa bana, lumad nga taga siyudad sa Mandaue, may kapuyo na sa Sityo Timbahan, Can-asujan.

Samtang, ang suspek mao si Roxan Gallino Racoma, 29, dalaga, apan may kapuyo, silingan sa biktima.

Nasayran sa Superbalita Cebu sa pakighinabi kang Romeo Racoma, amahan sa suspek, nga ang iyang anak ug biktima dugay nang nagbungol tungod sa mga tsismis nga binabaye.

Apan alas 4 sa hapon sa Hunyo 12, 2024, si Codeñera nasuko kang Racoma gumikan kay ang anak sa biktima nahagbong sa bisiklita samtang gikaduwa sa anak sa suspek.

Tungod sa hitabo, nagkaaway ang duha ka mga inahan.

Taliwa sa kainit sa ilang lalis, si Racoma nikuha og kutsilyo sa ilang balay ug gidunggab ang biktima nga naigo sa wala’ng dughan.

Ang biktima unang gidala sa Carcar Provincial Hospital ug gibalhin sa Vicente Sotto Memorial Medical Center (VSMMC) sa dugang pag-atiman.

Apan pagka alas 9 sa gabii sa samang adlaw, nakabsan sa iyang kinabuhi tungod sa grabe nga samad nga iyang naangkon.

Ang suspek nadakpan ug matod pa ni P/Staff Sgt. Regie Amad, investigator on case sa Carcar City Police, ang suspek mag-atubang og kasong murder. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph