Babaye gipatay sa lalaki nga nag-wild

GIPATAY: Si Marvin Caballes,19, nga nagbuy-od sa daplin sa karsada sa sityo Nivel, Brgy. Busay, dakbayan sa Sugbo, human pusila sa suspek nga si Wilbert Belarmino, 23. / TAMPO
GIPATAY: Si Marvin Caballes,19, nga nagbuy-od sa daplin sa karsada sa sityo Nivel, Brgy. Busay, dakbayan sa Sugbo, human pusila sa suspek nga si Wilbert Belarmino, 23. / TAMPO
‘KILLERS’: Sila si Wilbert Belarmino (wala), alyas Pungkol 23, ug Marwin Pantalita Caballes (tuo), 38, pulos taga Brgy. Busay, dakbayan sa Sugbo, gipangdakop tungod sa giiingong pagpamusil patay. Ang ilang mga krimen managkalambigit. Ngano man? Estorya basaha sa pahina 2. / MGA TAMPO
‘KILLERS’: Sila si Wilbert Belarmino (wala), alyas Pungkol 23, ug Marwin Pantalita Caballes (tuo), 38, pulos taga Brgy. Busay, dakbayan sa Sugbo, gipangdakop tungod sa giiingong pagpamusil patay. Ang ilang mga krimen managkalambigit. Ngano man? Estorya basaha sa pahina 2. / MGA TAMPO

Amahan sa usa ka lalaki nga gipusil patay niadtong Lunes sa alas 12:05 sa kaadlawon, Nobiyembre 20, 2023, sa sityo Nivel, Brgy. Busay, dakbayan sa Sugbo, nag-wild, namusil usab og babaye pipila ka oras ang nakalabay sa Sitio Tarcum, Barangay Lahug ning dakbayan.

Namatay ang 38-anyos nga biktima nga giila nga si Marites Allicer Caparida, human pusila sulod sa gym sa sityo Tarcum.

Ang biktima giingon nga dunay suliran sa pangisip.

Ang gitudlo nga suspek giila nga si Marwin Pantalita Caballes, 38, taga Sitio Lupa, Brgy. Busay ning dakbayan.

Ang biktima nakaangkon og samad pinusilan sa tiyan ug ubos sa walang dughan nga niresulta sa iyang hinanali nga kamatayon.

Sigun sa mga saksi nga samtang nag-inom og kape ang biktima, kalit lang nga dunay nipaka nga buto-buto sa armas ug sa ilang pagsusi, natumba na si Caparida.

Dali nga nisibat ang suspek sakay nagpaabot nga motorsiklo samtang dali nga gidala ang biktima sa Cebu City Medical Center (CCMC) apan gideklarar nga patay nang niabot.

Sa follow up operation sa Mabolo Police Station, nadakpan si Caballes ala 1:25 sa hapon sa Lunes sa Busay.Nakuha gikan sa suspek ang usa ka Smith and Wesson .38 kalibre nga revolver nga dunay duha ka mga bala.

PANIMAWOS

Matod ni Police Major Eraño Regidor, hepe sa Mabolo Police Station, nga bawos ang motibo sa krimen.

Siya nipasabot nga nisulong ang suspek sa sityo Tarcum ug gipanggukod ang iyang gipangdudahan nga maoy nipatay sa iyang anak nga si Marvin sa Sitio Nivel sa Dominggo sa udto.

Sa ilang nakuha nga kasayuran, si Caballes giingon nga nalambigit usab sa ilegal nga drugas sama sa iyang anak.

Ning pagsuwat, gipangita pa ang driver sa motorsiklo nga gisakyan ni Caballes sa iyang pagsibat, nga ila nang nailhan.

ANAK

Niadtong Dominggo sa udto, gipusil patay si Marvin, 19, drayber sa habalhabal, taga sityo Lupa, Brgy. Busay.

Sa gihimong manhunt, nadakpan sa Mabolo Police Station sa pagpangulo ni Regidor, ang suspek Wilbert Belarmino, alyas Pungkol, 23, sa Sitio Golden Valley, Barangay Lahug.

Nakuha sa posisyon sa suspek ang usa ka kalibre .45 nga pistola nga dunay mga bala sa magasin.

Drugas ang motibo sa pagpusil ni Belarmino kang Marvin, kay giingong duna utang nga mobalor og P60,000 sa usa ka drug player nga naa na sa sulod sa Cebu City Jail.

Giingong gi-hire ang suspek nga usa ka gun for hire sa kantidad nga P30,000.

Nagtuo sila si Regidor nga daghan na og napatay si Belarmino, di lang si Caballes ang unang biktima.

Busa ila pang dugangan ang backkground checking sa suspek aron makompirmar ang ilang pagduda.

Wala lang una ibutyag sa kapulisan kon kinsa ang drug player nga nabilanggo na nga nisugo sa pagpatay kang Marvin sanglit nagpadayon ang ilang followup operations.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph