Patay na nga nadangat sa Cebu City Medical Center ang usa ka babaye nga ex-convict human pusila sa wala pa mailhing mamumuno alas 4:31 sa hapon, Martes, Pebrero 11, 2025, sa Sitio San Juan, Barangay Mambaling, Siyudad sa Sugbo.
Ang biktima giila nga si Fritzel Manongdo Escorido, 28 anyos, nagpuyo ra usab sa maong lugar.
Nasayran sa imbestigasyon sa Mambaling Police Station nga samtang nigawas ang biktima sa iyang balay, kalit lang siya nga gipusil makaduha kahigayon tumong sa ulo ug liog niini.
Basi sa nakuha nga impormasyon nga drugas ang usa sa gitan-aw nga motibo sanglit nalambigit sa ilegal nga drugas ang biktima.
Mihimo na og backtracking ang Mambaling Police Station sa mga CCTV camera sa dapit isip kabahin sa ilang imbestigasyon ug aron ilhon ang nag-inusarang mamumuno.
Nadakpan sa mga sakop sa Mambaling Police Station si Escorido sa kaso sa ilegal nga drugas tulo ka tuig ang nakalabay. / AYB