Usa ka babaye ang gipusil samtang nagsakay sa motorsiklo sa may J. Luna Street, Corner Samar Loop sa Barangay Luz, Dakbayan sa Sugbo sa alas 10:30 sa buntag sa Lunes, Abril 14, 2025.
Ang biktima giila sa alyas nga Princess nga taga Barangay Luz.
Si Police Lieutenant Colonel Maria Theresa Macatangay, deputy city director for operation sa Cebu City Police Office (CCPO), nagkanayon nga nagsugod na sa ilang imbestigasyon ang Mabolo Police Station lakip na ang Theft and Robbery Section sa CCPO aron pagsuta sa tinuod nga estorya sa hitabo.
Lakip sa ilang gipangsubay sa pagkakaron ang mga kuha sa CCTV camera sa dapit ug ang pagpakighinabi sa mga saksi sa insidente.
Base sa inisyal nga impormasyon, giingon’g gitulis ang maong biktima sa suspek nga sakay sab sa motorsiklo ug dayon gipusil.
Dali nga gidala ang biktima sa labing duol nga tambalanan sa miresponde’ng medical team sa kagamhanan sa Dakbayan sa Sugbo.
Atol niining pagsuwat, wala pa masayri ang kahimtang sa biktima. / AYB