Igo lang unta nga nigukod sa binuhi nga iring nga misuksok ilawom sa naghunong nga 10-wheeler sa kalsada gumikan sa trapik, gisuong sa 74 nga babaye ang mananap apan miabante ang sakyanan hinungdan nga nalatayan ang biktima.
Ang insidente nahitabo sa dalan F. Llamas ug Tres de Abril intersection sa Barangay Punta Princesa, Dakbayan sa Sugbo niadtong udto sa Miyerkules, Marso 19, 2025.
Ang biktima giila nga si Maria Elina Dela Cerna, 74, samtang ang drayber sa traktor mao si Ronel Baliguat, 33 nga taga-Lungsod sa Borbon, Sugbo.
Base sa blotter sa Traffic Enforcement Unit sa Cebu City Police Office nga niaginod si Baliguat sa iyang gimaneho nga 10-wheeler tungod sa trapiko sa nahisgutang lugar, atol nga gigukod ni Dela Cerna ang binuhi nga iring nga nisuksok ilawom sa maong dakong sakyanan.
Way pagduhaduha gisuong sa biktima ang binuhi samtang wala kabantay si Baliguat nga aduna diay tawo ilawom sa iyang gimaneho nga 10-wheeler.
Nalatayan ang duha ka paa ni Dela Cerna sa luyo nga ligid sa tractor head sa dihang niabante ang maong10-wheeler.
Ang mga tawo sa maong dapit maoy nay nagpahibawo sa drayber nga adunay tawo ilawom sa iyang sakyanan.
Dali nga gidala sa tambalanan si Dela Cerna apan nakabsan sa iyang kinabuhi gumikan sa grabeng kadaot nga nahiaguman.
Samtang gitanggong si Baliguat ug nag-atubang og kasong Reckless Imprudence Resulting to Homicide. / DVG