USA ka babaye ang namatay human gipusil sa giingon’g riding-in-tandem duol sa eskwelahan sa Sitio Saint Anthony, Barangay Kalunasan, Dakbayan sa Sugbo pasado alas 9 sa buntag sa Biyernes, Abril 11, 2025.
Ang biktima giila nga si Glaiza Malabago Cabahug nga taga Barangay Duljo Fatima, Siyudad sa Sugbo.
Duha ka anggulo ang gisubay karon sa kapulisan sa pagpusil sa biktima nga padulong nga moduaw sa iyang kaipon sulod sa Cebu City Jail.
Wala wad-a sa kapulisan ang posibilidad nga may kalabutan sa ilegal nga drugas ang hinungdan sanglit ang biktima nabilanggo na kaniadto sa kaso sa ilegal nga drugas ug napaubos sa drug rehabilitation.
"Ongoing pa ang imbestigasyon ani sa atong kapulisan, pero katong iyang gibisita sa BJMP aduna na silay prior heated argument mahitungod sa matang sa kasing-kasing ba nga atong gitan-aw sa pagkakaron," matod ni Police Lieutenant Colonel Maria Theresa Macatangay, deputy city director for operation sa Cebu City Police Office (CCPO).
Si Macatangay niingon nga ang kaipon sa biktima nabilanggo tungod sa kaso sa illegal possession of firearms.
Matod ni Macatangay nga base sa nakuha nga impormasyon gikan sa kabanay sa biktima nga duna nay dili maayong relasyon ang duha gani gibaharan na siya nga dunay mahitabo kaniya nga maoy usa sa gisubay karon sa kapulisan.
Nihimo na karon og backtracking ang mga imbestigador sa mga kuha sa CCTV camera sa dapit.
Nisaad ang CCPO nga ilang sulbaron ang maong insidente sa labing dali’ng panahon.
Narekober sa Scene of the Crime Operatives (Soco) ang duha ka empty shells sa gituohang kalibre .45 nga armas nga gigamit sa wala pa mailhing mamumuno. (AYB / JDG)