Nakabaton og bun-og sa iyang nawong ang usa ka kondoktora sa modern public vehicle nga iya sa People’s Jeep sa dihang gisumbag sa usa ka hubog nga pasahero.
Kini nahitabo alas 8:25 sa gabii sa Dominggo, Hulyo 14, 2024 sa daplin sa national highway sa Brgy. South Poblacion, Siyudad sa Naga, habagatang Sugbo.
Ang biktima nga si alyas Lufemia, minyo, taga Purok Kamansi, Brgy. Quiot Pardo, Siyudad sa Sugbo.
Ang suspek giila nga si alyas Gerry, 44, ulitawo, construction worker, taga Marakas, PC Hills, Lahug, Dakbayan sa Sugbo.
Sa follow up sa Superbalita Cebu sa kapulisan sa Siyudad sa Naga nasuta nga ang kapulisan nagpatrolya sakay sa ilang patrol car ubos sa kamanduan sa ilang hepe nga si P/Lt. Col. William Homoc dihang ilang naagian ang kagubot sa dapit.
Nasayran nga ang biktima kuyog sa drayber su’d sa People’s Jeep nga nag-park sa maong dapit kay nagpaabot og pasahero,
Ang suspek sa kalit lang nisumbag sa nawong sa biktima.
Didto nahitabo ang kumosyon sa dihang ang biktima nangayo og panabang sa iyang drayber.
Ang suspek dali nga nasikop sa kapulisan nga nagpatrolya.
Kasong slight physical injury ang ipasaka batok sa biktima nga gitanggong sa kapulisan. / DVG