Usa ka 43 anyos nga babaye nga gituohang dunay kakulian sa pangisip ang nasikop sa mga kapulisan human kini giingong nangawat og motorsiklo alas 3 pasado sa hapon sa Sabado, Hunyo 21, 2025, sa may Opra Unit 1, Barangay Kalunasan, Dakbayan sa Sugbo.
Base sa nakuha nga ID gikan sa maong babaye, usa kini ka security guard sa usa ka mall sa Dakbayan sa Mandaue, ug lumad nga taga isla sa Camotes.
Base sa pasiunang imbestigasyon sa kapulisan, unang narescue ang babaye sa Barangay Banilad human giingong misuway pagkutlo sa iyang kinabuhi pinaagi sa pag-ambak sa atup sa alas 9 sa buntag, Hunyo 21.
Ang maong babaye gi-turn-over sa Guadalupe Barangay Hall apan giingong miikyas ug nanguha og motor nga di iyaha.
Naka-drive pa kini gikan sa Singson Street, Brgy. Guadalupe paingon sa Oprra, Barangay Kalunasan diin siya nababagan sa mga tawo sa maong dapit.
Ang miresponde nga mga kapulisan sa Guadalupe mao nay midakop sa maong babaye.
Gikumpirmar sa kapulisan nga dunay kakulian sa pangisip ang maong babaye. / JDG