Babaye nga nakagawas na unta sa prisuhan sa kaso sa illegal drugs nasikop sa buy-bust sa mga sakop sa Abellana Police Station 2 sa alas 11:45 sa Miyerkules sa gabii, Abril 3, 2024, sa Visitacion Street, B. Rodriguez Extention, Barangay Sambag 2, dakbayan sa Sugbo.
Ang suspek giila sa mga saksi nga si Jackilyn Bacus Tapayan, alyas “Jak-Jak,” 33, nagpuyo sa dapit.
Nakuha gikan sa suspek ang mga pinutos sa gituohang shabu nga motimbang og 15.72 gramos nga dunay standard drug price (SDP) nga P106,896.00, buy-buy bust money nga P500.
Matod ni Police Major Don Alfred Leanza, hepe sa Abellana Police Station, nga ilang gi-monitor si Tapayan human nihatag og impormasyon ang mga silingan niini.
Human madawat ang kasayuran, nilusad dayon sila og usa ka semana nga monitoring ug ilang nakompirmar ang buy-bust.
Nadakpan na niadtong November 2017 si Tapayan sa kaso gihapon sa ilegal nga drugas ug nakagawas sa Disyembre 2023.
Giingong makabaligya siya og 20 gramos matag semana ug gipangsubay pa nila asa magkuhaan sa iyang supply sa drugas. / AYB