Nabalhog sa Guadalupe police station ang usa ka lalaki human niya gapusa ang kamot ug tiil sa babaye'ng biktima tungod sa tumang pangabubho alas 9 sa gabii, Dominggo, Pebrero 9, 2025.
Matud ni Police Major Miles Damoslog, hepe sa Guadalupe Police Station, nga ang biktima ug ang suspek giingong friends ra nga taga Barangay Guadalupe.
Wala lang una nganli ni Damoslog ang suspek nga gibana-bana nga naa sa 30 ang pangidaron samtang ang biktima 23 anyos.
Nagduwa matud pa kini ug board games sa usa ka imnanan sa dalan Escario sa Barangay Kamputhaw apan usa sa ilang kauban nagpahatud sa usa ka condominium sa Banawa sa Barangay Guadalupe human sa ilang duwa.
Sa dihang ila na nga nahatud ang ilang usa ka barkada kalit lang nga giposasan sa suspek ang kamot ug tiil sa biktima.
Gipadagan sa suspek ang iyang sakyanan nga nagtuyok-tuyok sa Dakbayan sa Sugbo hangtod nga naabot sila sa Dakbayan sa Mandaue.
Nihunong matud pa sila sa usa ka convenience store aron mopalit ang suspetsado og tubig ug dinhi na nakahigayon ang biktima sa pagtawag sa iyang igsuon aron mangayog panabang.
Human makatawag gi trace dayon sa maguwang ang cellphone sa iyang manghod pinaagi sa GPS niini ug ilang nasubay kung asa kini nahimutang.
Nangayo ang pamilya og tabang sa Subangaku Police Station sa Mandaue City Police Office ug gi-track sa GPS hangtod nga mibalik ang sakyanan sa Dakbayan sa Sugbo.
Ila kini nga gigukod ug didto na nila nababagan sa dalan Cardinal Rosales Avenue, Barangay Mabolo ug nadakpan ang maong suspek.
“According sa biktima parang medyo nagselos daw yung suspect kaso magkakaibigan man sila, kasi itong biktima mas close pa duon sa isang kaibigan nya, parang nag-tantrum yung suspect bakit daw na mas close pa yung biktima sa isang kaibigan nila na nauna naman sila na nagkakilala daw,” matud ni Damoslog.
Giklaro ni Damoslog nga walay relasyon ang suspek ug ang biktima base sa pamahayag sa duroha.
Kasong illegal detention ang giandam nga kaso sa Guadalupe police station batok sa suspek nga wala na mohatag og pamahayag ngadto sa mga sakop sa media. / AYB