Kapin sa P500,000 nga balor sa ilegal nga drugas ang nasakmit sa Waterfront Police Station atol sa gilusad nga buy-bust alas 11:25 sa Lunes sa gabii, Abril 29, 2024 sa Sityo Lutaw-Lutaw, Barangay Sto. Niño, dakbayan sa Sugbo.
Ang operasyon niresulta sa pagkasikop sa usa ka babaye nga drug personality.
Ang suspek giila nga si Emily Alcontin Navasca, alyas ‘Meli’, 35, nagpuyo ra usab sa maong dapit nga nalakip sa drug watchlist sa PNP isip high value individual (HVI).
Nakuha gikan kaniya ang mga pinutos sa gituohang shabu nga motimbang og 80 gramos nga dunay standard drug price nga P544,000.
Matod ni Police Major Efren Diaz, hepe sa Waterfront Police Station, nga moabot sa usa ka buwan nga ilang gipaubos sa monitoring ang suspek human nigawas ang iyang pangalan.
Base sa report, giingong makabaligya kini og 200 gramos nga shabu sa matag buwan, samtang matag semana maka-dispose siya og 50 gramos sa iyang area sa Sityo Lutaw-Lutaw, Sto. Niño ug mga silingan nga mga barangay.
Ang mga nakuha nga ebedensya gi-turnover sa Cebu City Forensic Unit alang sa chemical analysis ug giandam na usab ang kaso nga ilang isang-at sa piskaliya. / AYB