Malampusong nasikop sa kapulisan sa Subangdaku Police Station 2, Mandaue City Police Office (MCPO) ang usa ka High Value Individual (HVI) nga babaye atol sa buy-bust niadtong alas 12:00 sa tunga’ng gabii, Biyernes, Abril 11, 2025 sa Sityo Aroma Barangay Subangdaku, Dakbayan sa Mandaue.
Ang dinakpan usa ka alyas Bebe, 41, taga Barangay Tejero, Dakbayan sa Sugbo ang nakuhaan og P13.6 milyunes nga kantidad sa gituohang shabu.
Sa pasiunang imbestigasyon sa kapulisan, ang suspek giingong maka-dispose og 2.5 ka kilo sa shabu matag buwan.
Gilusad ang buy-bust batok ni Bebe pinaagi sa mga personnel sa Drug Enforcement Unit sa Station 2, MCPO nga gipangulohan ni PMAJ Jade Sumugat inabagan sa Philippine Drug Enforcement Agency (PDEA) 7.
Atol sa maong operasyon, nasakmit gikan sa dinakpan ang kapin kon kulang duha ka kilo sa gituohang shabu.
Ang suspetsado temporaryong gitanggong sa MCPO Police Station 2, ug tukmang kaso ipahamtang batok kaniya. / JDG