
Gibanabana nga mobalor sa P17 milyunes ang balor sa gidudahang shabu nga nasakmit gikan sa usa ka giila nga High Value Individual (HVI) nga nasikop atol sa buy-bust alas 9:50 sa Miyerkules, Enero 15, 2025, sa Barangay Tipolo, Dakbayan sa Mandaue.
Ang nadakpan giila sa alyas nga Rose, 22, dalaga, taga Sityo San Roque, Lorega-San Miguel, Dakbayan sa Sugbo.
Dugay na nga gi-surveilance ang suspek ug sa dihang gi-validate, positibo siya nga namaligya ug nahimong bodegera og shabu.
Gikan sa Cebu City gikataho nga molabyog sab siya sa pagpamaligya didto sa Siyudad sa Mandaue hinungdan nga gihimo ang buy-bust. Nakuha gikan sa suspek ang duha ka kilo ug singko gramos nga gituohang shabu nga gibanabanang moabot sa P17 milyunes.
Ang buy-bust hiusang gihimo sa mga sakop sa City Intelligence Unit, City Drugs Enforcement Unit sa Mandaue City Police Office ug sa Philippine Drug enforcement Agency (PDEA) 7. / DVG