Nagtingkagol sa prisuhan ang 31 anyos nga babaye nga nasikop human nanglabni og cellphone sa usa ka bata alas 3:28 sa hapon, Dominggo, Enero 7, 2024, sa dalan Pope John Paul II, eskina sa dalan New Era, Barangay Mabolo, dakbayan sa Sugbo.
Ang suspek giila nga si Michelle Escobal Dilla, taga Sitio Bato, Brgy. Ermita, siyudad sa Sugbo.
Sa imbestigasyon sa Mabolo Police Station pinaagi sa hepe nga si Police Major Eraño Regidor nga samtang nagbarog daplin sa dalan ang biktima nga 11 anyos nga lalaki, taga Sitio Zapatera, Bario Luz nga nagdala sa iyang Iphone 7S nga mokantidad og P8,000, kalit nga niabot ang suspek ug gilabni kini, dayong dagan.
Apan ang suspek nalamba sa karsada human maligas ang tiil niini sa gutter nga maoy nakaingon nga siya naangol.
Naatol usab nga naa sa maong lugar ang mga barangay tanod sa Mabolo sa pagpangulo ni Saraum Camilo ug Roberto Gorosin Jr. nga maoy nidakop kaniya ug nakuha pagbalik ang cellphone sa biktima.
Matod ni Regidor nga nagbalikbalik na sa sulod sa Cebu City Jail ang suspek sa mga kaso nga pagpangawat.
Kasamtangan nga naa sa kustodiya sa Mabolo Police Station ang suspek ug giandam na usab ang kasong pagpangawat nga isang-at sa kapulisan batok kaniya.