Usa ka babaye nga naka-plea bargain niadtong 2019 sa kaso sa illegal nga drugas ang nadakpan pagbalik sa Philippine Drug Enforcement-Regional Special Enforcement Team uban sa Parian Police Station 1 sa Cebu City Police Office atol sa buy bust alas 2:31 sa hapon, Biyernes, Oktubre 11, 2024 sa Sitio Laguna, Barangay Lorega, Dakbayan sa Sugbo.
Ang suspetsado giila nga si Cherrie Mae Rabor, 35, residente ra usab sa maong lugar ang nakuhaan og pitol ka pakete sa gituohang shabu nga motimbang sa 15 gramos nga dunay estimated average market value nga P102,000.
Sumala pa ni Leia Alcantara information officer sa PDEA-7 nga nakadawat sila sa impormasyon gikan sa kasaligang tinubdan nga ang suspetsado nga si Rabor mibalik sa iyang pagpamaligya sa ilegal nga drugas.
Gikataho nga maaka-dispose kini og 20 ngadto sa 30 gramos nga shabu matag semana nga tungod ani ila dayon nga gi aksyonan pinaagi sa paglusad sa buy bust.
Nabilango na sa Cebu City Jail si Rabor niadtong Marso 2019 human madakpan sa kaso sa illegal nga drugas apan nakagawas ra usab human mi-apply sa plea bargain.
Kalapasan sa Section 5 ug 11, Section II, Republic Act 9165 ang atubangon nga kaso sa suspetsado. / AYB