Nakahinumdom ka pa ba sa usa sa giila sa kapulisan nga ‘bad boy’?
Nalutsan na usab kini og warrant of arrest ug nasikop sa lungsod sa Medellin.
Si Reynante Eyac, 43, minyo, alyas Nante, nasikop subay sa warrant of arrest sa kasong kalapasan sa Republic Act 10591 o Comprehensive Firearms and Ammunition Regulation Act.
Kini maoy gikompirmar ni Major Timothy Jim Romanillos, hepe sa Medellin Police Station nga nahinabi sa Superbalita Cebu, sa Biyernes, Marso 22, 2024.
Si Romanillos niingon nga si Judge Samson Troy Kintanar Layese sa Branch 79 sa Regional Trial Court (RTC) sa dakbayan sa Bogo maoy niisyu sa warrant nga gipitsahan og Marso 19, 2024.
Matod ni Romanillos, si Eyac nakabutang og P120,000 nga piyansa sa Huwebes, Marso 21, 2024 sa korte sa Bogo.
Gibutyag niya nga ang nailang “bad boy” sa ilang lugar dugay na nagtago-tago human daghang reklamo nga nadawat batok niini.
Giingong naglikay kini nga madakpan kay nalutsa’g warrants of arrest sa iyang mga kaso.
“Naa siguroy nakapindot niya nga dunay migawas nga warrant, gisugat dayon nila sa korte og piyansa,” dugang ni Romanillos.
Si Eyac gidakop niadtong Nobiyembre 22, 2023 sa Qimonda Palace of Justice sa dakbayan sa Sugbo human nitambong sa hearing sa iyang mga kaso niini.
Gi-serve ang tulo ka warrants sa kasong grave threat nga giisyo ni Judge Hyacinth John Jadraque sa Municipal Trial Circuit Court-Medellin.
Si Eyac nadakpan sab niadtong Mayo 9, 2023 sa Barangay Poblacion, Medellin.
Si Jadraque ang niisyu sa warrant nga gipitsahan og Abril 26, 2023.
Ang kapulisan nironda sa sab sa iyang panimalay sa Antipolo, Medellin niadtong Hulyo 3, 2023 apan nakaipsot si Eyac. Nakuha ang usa ka kalibre .45 nga pistola, duha ka mga magazine nga dunay mga bala.
Samtang, si Executive Judge Samson Troy Layese maoy niisyo sa search warrant nga gipitsahan og Hunyo 27, 2023. / GPL